(من تساوى يوماه فهو مغبون )
يا هله يا هله شلونكم يا بيبل شخباركم احنه باليوم الاخير من التحدي الجميل تحدي ال29 يوم مع مرتضى التميمي هذا التحدي سوا مرتضى بمناسبة عيد ميلاده ال29 طبعا اتمناله كولشي حلو وجميل بهاي الدنيا فكرة التحدي انو تتحدى نفسك وتتعلم شي انت تحبه يفيدك ويطور مهارتك .
اني تبارك من بغداد عمري 30 سنه خريجة هندسه اتصالات الحاسوب اشتغل باحد الدوائر الحكوميه كنت انسانه تريد تنهض بنفسها وتحقق اهدافها بس ما تعرف شلون واصلا مجنت اعرف اني شريد او شنو اهدافي وكانت السلبيه والتسويف والمماطله ماليه حياتي .
هذا التحدي غير حياتي حرفيا غيرني اني كشخص زرع بداخلي الالتزام والتحدي والاراده والاصرار واكمل الشي البديت بي للاخرلان نهائيا ما كنت اكمل شي بكل شي بالحياة مع الاسف وانو الانسان عنده قابليه يكدر يسوي اى شي يريده بالدنيا علمني انو اني انسانه ناجحه لان جان عندي احساس كولش قوي بالفشل ما اعرف ليش بس الحمدلله خلال هاي الايام هذا الاحساس راح وانتهى بالعكس اجه بمكانه الايجابيه والامل بالحياة اصلا صارت هاي السنه سنه تحقيق الاهداف بالنسبه اليه رغم هي مباقيلها الا شويه وتنتهي بس اني رح استغل الباقي كولش زين واشتغل ع نفسي.
بديت هذا التحدي وهدفي كان اقوي نفسي باللغه الانكليزيه واطور مهاراتي بيها علمود امتحن IELTS واجيب درجه عاليه بي وانقبل منحه باوربا حتى اغير حياتي واغير واقعي لان حلمي اشتغل برا ويصير عندي شركة برمجيات واتعرف على ناس واكون صداقات من مختلف الثقافات واشوف طبيعه جديده كولش احب الشلالات والخضار والحمدلله كولش اتقدمت واتطور مستواي بالانكلش وراها قررت اختصرطريق التعلم وقررت ادخل معهد لتعليم اللغه الانكليزيه وفعلا بلشت وجانت خطوه موفقه.
خلال هاي الايام عرفت عندي موهبه حلوه وهي تأليف القصص القصيره وربطتها بهدفي وكمت اكتب قصص قصيره باللغه الانكليزيه
يوم عن يوم حب التعلم والاصرار يزيد وقررت اتعلم ال Photoshop وفعلا بديت ووصلت لمستوى كولش حلو .
وراها قررت اتعلم البرمجه اني ما اعرف شي بيها عدا لغة ++c الي درسناها بالكليه وجان اكو استاذ اعرفه الله يذكره بالخيردائما يحجي بالبرمجه والدورات الي دخل بيها وشلون بعدين الجامعات العربيه والبرا كامت تطلبه علمود يدرس بيها هذا الشي خله عندي فضول اتعلمها وفعلا بديت ببرمجة المواقع الالكترونيه واتعلمت لحد الان لغة html & css .
مع الاسف خلال اخر اسبوعين من التحدي انصابيت بفيروس كورونا وكانت الاصابه شديده وهذا الشي خلاني اتلكأ كم يوم بس بعدين رجعت الحمدلله واقوى من قبل والله يكتبلي واتشافى نهائيا يارب .
بالاخير اني ممتنه لرب العالمين الي عرفني على مرتضى وصار حسابه بدربي وممتنه لنفسي على تحملها اني ...
طبعا بتعلم الانكلش استخدمت ابلكيشن وايضا تطبيق التابع للقنصليه البريطانيه في العراق وايضا هذه القناة الجميله .
وبتعلم الفوتشوب اعتمدت هاي القناة اما بتعلم البرمجه هاي القناة .
